midy à faire retirer son Canon, & pour cét effect
on luy auoit enuoyé de la Cour des Cheuaux :
& pour cacher ce honteux dessein, il fit feinte
de vouloir donner vn assaut general, faisant
mettre tout ses gens sous les armes. Nos assiegeans
neantmoins qui auoient esté si longtemps
en repos, se douterent bien qu’ils se vouloient
retirer ; C’est pourquoy Monsieur le
Comte de Thauanne & Monsieur de Climchamp
firent obseruer leur procedé, & cependant
firent aussi mettre de leurs cotté tous leurs
gens sous les armes, afin de donner sur la queüe,
en cas qu’ils se retirassent.

Enfin deux heures apres Monsieur de Thauannes
fut aduerty que leur Canon qu’ils
auoient mis sur vne petite eminence ne parroissoit
plus, & que les ennemis quittoient peu à
peu leurs postes, dequoy nos assiegez estant aduertis
se preparerent à leur courir sus. Pour cét
effect Monsieur de Thauannes fit sortir par la
porte de Paris le regiment de Languedoc,
soustenu de six cens cheuaux, & par la porte
d’Orleans le regiment de son Altesse Royale
auec quelqu’autres Regimens, le tout sous la
conduite de Messieurs de Rauenel & Bossu,
soustenus pareillement de six cens Maistres, lesquels
fondirent si vigoureusement sur eux, qu’ils
leur tuerent plus de 300. hommes, quoy qu’ils