voir vn exẽple de moderatiõ iusques à present incõnu dãs cet Estat.
qu’vn premier Ministre apres six ans d’heureuse administration, ne
se trouue auoir, ni charge de la Couronne, ni gouuernement de
Prouince, ni autre bien que quelques Abbayes pour soûtenir
sa dignité : Et ceux qui sont si animez contre luy n’en ont autre
sujet que la fermeté qu’il a euë à në pas conseiller au Roy qu’il se
laissast dépouiller de son authorité & de son bien : Enfin, il n’a iamais
fait mal à personne qu’aux Ennemis de la France, & sans cette
douceur qui luy est naturelle on ne verroit pas le Duc de Beaufort
ni le Mareschal de la Mothe à la teste de nos troupes rebelles. Voila
certes vne Apologie bien affectée, & qui feroit passer le Cardinal
pour le premier des innocens chez des Estrangers qui ne le connoistroyent
pas, & nous pour les plus ingrats des hommes : mais elle ne
sert icy qu’à faire voir la malice criminelle de son autheur, qui se disant
Des-interessé paroist tout remply d’interest en ce lieu, & y
traite si mal la verité, & toutes fois si grossierement qu’il n’y a personne
qui n’en puisse iuger. Tant de plumes qui ont écrit le contraire
se sont donc bien trompées, ou ont esté bien excitées par l’enuie :
On a donc bien publié des faussetez depuis peu, & tãt que nous
sommes deuons bien estre estimez visionnaires. Chacun se plaint,
est-ce pour seruir d’echo les vns aux autres ? Nous auons le sentimẽt
des maux qu’on nous a faits, est-ce vn effet d’imagination troublée ?
Sans repeter ce qui est imprimé & a esté publié en tant de feuil
les, qui sont autant de pierres de touche ausquelles on peut reconnoistre
les mensonges auancez par le Des-interessé, ie me contenteray
de dire que si le Cardinal n’a point de places, de Gouuernemẽs
ni de charges, il a le Royaume tout entier, il dispose de tout l’Estat, il
donne & vend les Gouuernemens, les Charges & les Benefices, & a
les millions d’or de la France transportez par son ordre aux lieux où
il se doit refugier : ce qui peut estre cause de la disette qu’il en a icy &
du renuersement de sa cuisine, que son Partisan prend pour argument
de la mediocrité de son bien.

Quant à sa douceur elle a toute esté pour les ennemis de la France
auec lesquels il s’entend trop pour leur faire mal : mais pour nous, il
n’a iamais eu que de la tirannie. Alexandre disoit d’Antipater qu’il
estoit blanc au dehors & rouge au dedans : Ce Cardinal l’est à l’exterieur
& dans l’ame : Sa pourpre & les haches qu’il a prises dans ses
armes, ne seruẽt qu’à témoigner les sanglants desirs de son cœur qui
ne respire que carnage : & l’emprisonnement du Duc de Beaufort &
du Mareschal de la Mothe-Houdancourt, que le Des-interessé feint