siront à ceux qui ont vne ame innocente, & qui ne
se plaisent qu’au seruice qu’ils rendent à Dieu & à
leur Roy, cette valeur hereditaire à la France & naturelle
à ses enfans, sera opposée à l’iniuste vsurpation
des infidelles, nos gens de guerre accoustumez aux
triomphes & aux palmes, iront les cueillir dans la
Palestine, à la ruine totale des Ottomans. Hierusalem
deshonorée par leurs impietez & sacrileges, se verra,
bien-tost sous la domination des Chrestiens, & le
Croissant fera place à la Croix. Alexandre qui n’auoit
autre lumiere que celle que donne la nature, se prosterna
deuant l’estendart des Israëlites, par vn respect
qu’il porta au Taf figure de la Croix, c’est la banderolle
qui doit intimider l’insolence des Barbares, c’est
en ces lieux où le Seigneur fera des miracles, faisant
tomber vne grande multitude sous le pouuoir d’vn
petit nombre. Monsieur de Mercœur y a laissé des
marques de l’assistance que Dieu luy a faite, & des
effets qui doiuent seruir d’instruction & d’exemple à
tous ceux qui ont leur memoire en recommandation.
Canise a veu rougir ses mains & celles de ses trouppes
au sang des mescreans : mais s’il n’eust defendu la
querelle de Dieu, toutes ses Victoires seroient suspectes
& passeroient pour fabuleuses, ce seroient des
Romans ou l’on adjousteroit au conte, & où les pieces
rapportées n’entretiendroient nos esprits que de
scrupule. Estoit-il possible humainement à douze
mil hommes de mettre en deroutte, ny mesmes d’eschapper
du pouuoir de deux cent mille qui les attendoient

page précédent(e)

page suivant(e)