Vaudémont, Charles de / Charles IV, duc de Lorraine [?] [1652], LA DECLARATION DV DVC DE LORAINE A SON ALTESSE ROYALLE, ET A MESSIEVRS LES PRINCES, Sur l’approche de ses Trouppes és enuirons de Paris. Ensemble sa Lettre escritte à Messieurs du Parlement sur ce sujet. , françaisRéférence RIM : M0_898. Cote locale : B_8_48.
page précédent(e)

page suivant(e)

-- 7 --

qu’auec l’assistance de Monseigneur & frere le
Duc d’Orleans, de Messieurs les Princes & de
vous, conclurent dans peu de temps, ie croy
que nulles plaintes de mes gens ne sont encores
venües iusques à vos orreilles, & vous connoistrez
que mes armes ne sont leuées que pour
multiplier les bonheurs, & chasser loing les malheurs
qui vous talonnent au sujet d’vn Estranger ;
ie vous preste mon bras & ma vie ; & promet
de vous retirer de ses tyrannies, pourueu
que vous me permettiez de me vanger, chez
vous, de celuy qui vous consomme, & lequel m’a
malicieusement spolié de mes Estats ; ie mourray,
ou ie le mettray entre vos mains afin d’exercer
sur luy non la rigeur, ains seulement la Iustice
de nos Arrests. Ors cela n’esperez point de Paix,
& croyez que tant que cet homme rougissant de
malisse regnera, que vous n’aurez jamais de repos ;
De moy ie ne vous demande rien pour la
subsistance de mes Trouppes, grace à Dieu j’ay
de quoy les entretenir plus de huit ans, sans leur
permettre la milliesme partie des insolences,
que le sieur Mazarin souffre regner parmy les
siennes. Ie veux & c’est mon desir de faire sçauoir,
ó ! Venerable Senateurs, que i’ay auec moy dix
mil hommes effectifs, sans quelques compagnies
de braues volontaires qui se sont jettez
dans mes Trouppes, comme malgré moy ; lesquels


page précédent(e)

page suivant(e)