Suauld [signé] [1651], ARREST DE LA COVR DV PARLEMENT DE BORDEAVX: POVR LA IVSTIFICATION DE Mr LE PRINCE: Sur le Suiet des calomnies inuentées contre son Altesse par les factionnaires du Cardinal Mazarin, pour le faire sortir de Paris, & faciliter le retour de leur Maistre. ENSEMBLE LES REMONSTRANCES du mesme Parlement faites au Roy sur ce sujet, & les Lettres écrittes à la Reyne Regente, à Mr le Duc d’Orleans, & à Mr le Prince. , françaisRéférence RIM : M0_192. Cote locale : B_7_58.
-- 8 --
dessein qu’ils ont de desunir la Maison Royalle,
pourroient supposer de nouueaux sujects, pour
troubler cette vnion si necessaire au seruice du
Roy, Nous supplions tres-humblement vostre
Majesté, apres auoir consideré l’importance de
l’escrit qui a esté publié de faire establir des peines
proportionnées au Crime de ceux qui ont donné
cét aduis, & pour vnir le sang Royal en faire cesser
l’alteration, & par ce moyen maintenir le Royaume
dans vne tranquilité necessaire, Vostre
Majesté, regnera dans les cœurs des Peuples &
& le Roy dans sa Majorité verra que vostre Majesté
ayant estably la paix dans sa maison l’assure
par ce moyen dans tous les Estats. Nous auons
suiect de continuer à recognoistre les graces que
nous deuons à Vostre Maiesté, par les seruices
que nous luy rendrons puisque par ce moyen vostre
bonté confirmera la Paix qu’elle nous a donnée,
& dans toutes les occasions Vostre Maiesté
nous verra.
La suscription estoit,
A la Reyne Mere du Roy,
Regente en France.
MADAME,
Vos tres-humbles, tres-obeissans
Seruiteurs les Gens tenant la Cour
de Parlement de Bourdeaux.
Escripte à Bourdeaux en Parlement, les Chambres
Assemblées, le 30. Aoust, 1651
|