Depontac [signé] [1649], ARREST DE LA COVR DE PARLEMENT DE BOVRDEAVX. Du quatorziesme Aoust 1649. Portant que le Roy sera informé des troubles excitez de nouueau, dans la ville de Bourdeaux, & Prouince de Guyenne, par la continuation des actes d’Hostilité. , françaisRéférence RIM : M0_162. Cote locale : A_1_100.
page précédent(e)

page suivant(e)

-- 5 --

rapporter autre aduantage de cette entreprise, que d’auoir
causé vne alarme & emotion generale, à toute la
Ville, & d’auoir abusé des armes du Roy, dans vn
lieu où son authorité regne, par les voycs de la Iustice,
& contre ses Officiers qui reçoiuent tout ce qui
vient de la part de leurs Majestez, auec vne parfaite
& respectueuse submission, & qui ont employé tous
leurs soins, pour pacifier les troubles, que ces voyes
de faict ont excité dans la Ville, qui s’augmentent de
plus en plus, par la retention des Batteaux, qui descendent
du haut pays, chargez de bleds, marchandises
& autres choses necessaires pour la subsistance de
la Ville, par l’occupation de diuers passages des, viures,
à main armée, par l’emprisonnement de diuers
Habitans de cette Ville, par l’enleuement des
grains qui leur appartiennent, par la violence faite
aux Courriers ordinaires, contre la foy publique, &
l’authorité des Arrests du Conseil, par la conuocation
de la Noblesse, par l’approche des trouppes, &
des leuées & assemblées des gens de guerre, faites
de toutes parts par l’ordre du sieur Duc d’Espernon,
& par des actes d’hostilité, qui descouurent vn
dessein de faire vne cruelle guerre à cette Ville, &
Habirans d’icelle, & d’executer les menaces de la
desoler par le fer & le feu, sans aucune difference de
sexe ny d’aage, au prejudice du seruice du Roy, & du
bien de l’Estat, & contre les intentions de leurs Maiestez.
A quoy il est necessaire de pouruoir, & Oüy
le Procureur General du Roy, LA COVR, les
Chambres assemblées, A ORDONNÉ ET
ORDONNE, que le Roy sera informé des troubles
excitez de nouueau, dans la Ville de Bourdeaux,


page précédent(e)

page suivant(e)