de Generalissime des Armées du Roy ; Il a
porté le fer & le feu par tout, & faisant
semblant de seruir le Roy, il fait maintenant
vn continuel embrazement de tout
son Royaume. Aussi Dieu qui ne permet
iamais le mal que pour en tirer vn plus
grand bien, a suscité pour la France Monseigneur
le Duc d’Orleans, pour remedier
à tous ses malheurs : Son Altesse Royale
donne tous ses soins pour la conseruation
de cét Estat ; Et il semble que le Cardinal
Mazarin & le Conseil, ont pris à [1 mot ill.] de
destruire ce que ce genereux Prince a tant
de peine à conseruer Toute l’Europe a esté
tesmoing des persecutions que son Altesse
a souffert des Fauoris, & la moderation
dont Elle a vsé dans les mauuais déportemens
du Cardinal Mazarin, a estonné les
plus affectionnez au bien de la France, &
maintenant que son Altesse a veu que le
Cardinal Mazarin alloit donner le coup
mortel à l’Estat, s’estant rendu encores
plus puissant apres sa Majorité, Elle s’est
declarée contre ce Ministre, ne pouuant
plus souffrir ses insolences, & a resolu
d’employer toutes ses forces pour le chasser.

page précédent(e)

page suivant(e)