Ministre ne portoit point de coup au peuple dõt ils ne ressentissẽt l’atteinte.
Leur douleur naissoit de la nostre. Et s’ils n’ont plustost crié
vangeãce à la Reyne contre vne peste d’Estat, des maux qui nous accablent,
c’est que n’estant pas moins ialoux du repos de sa Maiesté, que
de celuy de ses Peuples, ils n’estimoient pas pouuoir ouurir la bouche
pour l’vn, qu’aux despens de l’autre. Cette consideration qui naissoit
d’vn zele & d’vn amour veritablemẽt François, a nourry leur patience
iusqu’aux abbois de la nostre : & leur cõpassiõ de l’excez de nos maux,
apres vn long silence, les a contraints de crier plus haut que nous-mesmes.
Il seroit icy superflu, grand Monarque, de vous entretenir
des disgraces que leur a cousté leur ardeur à se declarer pour la France
opprimée contre ses oppresseurs. Et ie m’asseure, que vous n’attendez
pas de ma bouche vn recit que vous auez appris de la voix publique.
Mais de quelque aigreur qu’il les ait persecutez, ce monstre alteré de
sang n’ayant peu par aucun effort estonner leur constance plus qu’humaine,
apres auoir inutilement tasché de nous enleuer l’vn apres l’autre,
ces genereux Protecteurs de nostre liberté mourante, a bien osé
tenter de nous les oster tous ensemble, & de confiner à Montargis ce
corps auguste, ou plustost cét illustre amant de la plus belle Nymphe
de la France, pour auoir meilleur marché de l’vn & de l’autre, apres
les auoir des-vnis. C’est en cette extremité, grand Monarque, que se
liurans l’vn à l’autre, ils se sont iurez la foy coniugale, qui malgré l’Enfer,
en presence du Ciel & de la Terre, les a liez d’vne chaisne si forte
& si serrée, qu’on ne sçauroit non plus chercher sans crime, que trouuer
sans difficulté les moyens de la rompre. Et c’estoit pourtant pour
les disposer à ce criminel & funeste diuorce, que furẽt auortez du sein
de l’Enfer, & tracez en caracteres de sang, de la main d’vn Demon,
possible du nombre de ceux qu’on appelle incarnez ; ces infames &
detestables libelles, qui furent semez dernierement par ce denaturé,
qu’on a mis dans la tour de Montgommery. Mais il faut bien
d’autres Machines, pour venir à bout d’vne si noire entreprise.
Qu’on ne cesse de tonner & de foudroyer à nos portes. Il n’est ny
feu, ny fer, qui puisse des-vnir deux moitiez qui forment vn tout si
precieux & si necessaire au salut de la France. La valeur de nostre Amazone
(ie ne puis m’empescher de nommer de la sorte l’Espouse de
nostre Parlement) sa valeur, dis-ie, que ce pernicieux dessein a sans
doute irritée, tousiours preste à seconder celle des Protecteurs de son
honneur & de sa franchise, ne sçauroit plus se contenir, sans estre gesnée

page précédent(e)

page suivant(e)