Anonyme [1652 [?]], LA SVITTE DV PARLEMENT BVRLESQVE de Pontoise, Et les moyens de recusations, enuoyez par la ville de Paris à ceux qui le composent. , françaisRéférence RIM : M0_3727. Cote locale : B_15_35.
Premierement, vous President, Dont la Barbe eut tant d’ascendant, Sur la pauure badauderie, Pourquoy tant de trigauderie ? Et pourquoy si saint & pieux Estes vous si peu soucieux ; Du bien de nostre ieune Prince, Dont on rend le credit si mince, Si ce n’est que vos interests Vous touchent vn peu de plus prests ? La Mitre & la rouge Calotte, Dont vostre esperance on balotte, Les Abbayes & les Sceaux Sont direz vous de bons morceaux, Et meritent bien que l’on choye La main qui tient si belle proye. Et vous President de Nouyon, Pourquoy ployer comme vn cyon, Vous, qui iadis aux Assemblées, Donniez de si rudes sanglées A ce Faquin que vous suiuez : Nous iurerions que vous reuez, Si nous ne sçauions qu’vne Crosse D’vn Genest peut faire vne rosse, Comme l’Euesché de Beauuais, D’vn homme de bien vn mauuais.
| |||||