Anonyme [1649 [?]], LA SORTIE DE MONSEIGNEVR LE DVC DE BEAVFORT DV BOIS DE VINCENNES. STANCES. , françaisRéférence RIM : M0_3695. Cote locale : E_1_40.
Certes quand ie te considere Descendre à l’ayde de tes bras, Et fondre comme vne Aigle en bas, Mon cœur parle & ne se peut taire : De cet effroyable danger Vn, cordeau t’a sçeu desgager, Et i’oster des mains de l’Enuie ; Ha, bon Dieu ! quel estrange sort, Ce qui rauit souuent la vie, Te sauue heureusement du glaiue de la mort.
A cette iuste violence Vn Exempt voulut s’opposer ; Que luy seruit de resister, Ton bras le mit hors de defense : En vain & à diuerses fois Il taschoit d’éleuer sa voix, Langoisse le force à se taire, Qu’on te loüe auec raison, Puis qu’au plus fort de ta colere Tu le fis seulement brider comme vn Oyson.
|