de tout ce qui s’est passé parmy les troupes
de ce Prince depuis sa retraitte de
Paris, & notament en la prise de la ville
& chasteau de Crëil ; ie vous en veux
donner des particularitez que i’ay prises
d’vne lettre escrite du mesme lieu, en
datte du seiziesme de ce mois, dont voicy
l’extraict.

MONSIEVR,

Depuis la derniere que ie vous ay écrite,
nous auons esprouué l’effet des apprehensions
que ie vous mãdois où nous estions,
& de gens qui iusqu’à present auoient vescus
en repos, & hors la contrainte de se declarer
de l’vn ny de l’autre party, nous auons esté
obligez d’embrasser celuy de Monsieur le
Prince, pour nous exempter des mal-heurs
du siege dont nous estions menassez, Son Altesse
estant arriuée dés le douziesme de ce
mois en son Chasteau de Chantilly, accompagnée
de trois cens cheuaux, ou enuiron
la pluspart Noblesse ; ayant laissé le reste de
ses troupes tant Lorraines qu’autres, sous
la conduitre de leurs Chefs, campées entre
Dammartin & Villers Cotterets, Il fut tenu