des personnes gagées, & lesquels il ne sçauroit iustifier auec toutes
les trahisons de Sicile, d’Italie, ny d’Espagne, ny auec tous les
millions qu’il nous a volez.

Auec tant de prodigieuses trahisons il voudroit bien que
le peuple le creust homme de bien, parce qu’il fait semblant
d’estre vostre amy, & parce qu’il publie par tout que vous
estes le sien : Mais nous voyons trop clairement qu’il ne fait
que destruire l’Estat ; car les Officiers de la Maison du Roy
venant de Bourgogne, & n’ayant pas vn sol pour payer leur
despense, ont esté contraints de laisser des promesses de leur
main aux Maires & Escheuins des Villes où ils ont passé,
par lesquelles ils promettent que sa Majesté leur tiendra en
conte sur les Tailles à venir, les frais qu’ils y ont faits. Est-ce
de la façon que les Rois de France ont accoustumé de viure ?
Sont-ce les soulagements qu’il donne aux peuples, qui
chargez excessiuement de Tailles, sont encore obligez de
nourrir la suite du Roy à leurs propres despens ? Cependant
que le Ministre donne des millions qu’il nous arrache des
entrailles, pour faire sousleuer les Prouinces, & pour se
rendre necessaire à l’Estat, comme s’il estoit necessaire de ruiner
la France pour soustenir la Couronne.

L’armée Nauale qui deuroit estre la chose du monde la
mieux payée, a-t’elle receu vn denier depuis deux ans ? Et
les Capitaines des Galleres apres s’estre ruinez par l’aduance
qu’ils ont fait de tous leurs biens, n’ont-ils pas esté contraints
de tout abandonner pour s’en venir faire des plaintes
au Roy ? que de vingt-sept Galleres que sa Majesté auoit
dans les ports de Thoulon ou de Marseille en Prouence, il
ne s’y trouue pas dequoy en mettre six en estat d’aller sur
mer ; ayant laissé mourir de faim faute de payement, tous
ceux qui y estoient, disant que tout le Royaume n’est pas
suffisant pour les remettre en bon estat ? Est-ce de la maniere
que l’on deffend les interests du Royaume, en faisant
perir par le caprice d’vn Ministre, qui nous vole tout, les meilleurs
appuis de la Couronne ?