Anonyme [1649], LA MICARESME DES HARANGERES, Ou leur entretien sur les affaires de l’Estat. , françaisRéférence RIM : M0_2466. Cote locale : A_6_31.
page précédent(e)

page suivant(e)

-- 7 --

Dame Nicole. Dieu veuille les conseruer, ma foy ie
l’en prieray de bon cœur.

Dame Georgette. Ie le prieray aussi de vouloir conseruer
tous noutes Messieurs du Parlement, ils sont de
braues gens, & sur tout noutre bon Monsieur de
Bruxelle ces braues gens là, ils ont grand peine, Dieu
leur en doint leur salaire.

Dame Pacquette. I’auons aussi de braues gens à la Maison
de ville, & y a vne braue Dame que Madame la
Duchesse de Longueuille, alle ayme bien Paris, alle y
est accouchée d’vn biau garçon.

Dame Nicole. Dieu ly fasse la grace d’estre vn iour
aussi sage que son pere & sa mere, & luy donne vne
longue & heureuse vie.

Dame Georgette. I’auons assez deuisé des affaires
d’Estat, i’auons bien merité de boire chacune vn
coup, aussi-bien vouest auiourd’huy la Micaresme.

Dame Pacquette. Ma foy i’en suis d’auis beuuons.

Dame Nicole. Et moy aussi beuuons donc.

FIN.



page précédent(e)

page suivant(e)