pour marque de la passion qu’ils ont eü de maintenir leur
liberté, ils ont pris ce nom de gloire & d’ambition de francs
ou François, pour montrer l’auersion qu’ils ont eü de la tyrannie,
si ennemie de la nature de l’homme si opposée aux
Loix du Christianisme, & au nom & empire d’vn Roy Tres-Chrestien ;
Enfin deffense dautant plus iuste qu’elle est encor
entreprise pour empescher le renuersement des Loix
fondamentales de tout le Royaume qu’il medite & prepare
restablir les choses dans leur premier estat, retirer le Roy
qu’il nous a volé de ses mains, de la personne duquel le Parlement
est respõsable à tous les Estats du Royaume & à tous
les Princes de la terre, & paruenir a son retour en sa bonne
ville de Paris, si desirée de tous les gens de bien &
pour lequel on fait tant de prieres à Dieu, comme estant
celuy qui doit changer nos iours d’affliction en des iours de
joye & de réjouissance, rapporter la tranquillité passée &
donner moyen au Parlement & à la ville de Paris de luy
continuer ses seruices & deuoirs accoustumez.

Et que les Partizans, ces oyseaux de proye, ces tyrans du
Peuple, ne disent point que le Parlement a cherché la reformation
de l’Estat dans vn temps hors de saison, & que leurs
deliberations ont apporté vn notable preiudice aux affaires
du Roy, & ont empesché la leuée des deniers, & qu’ils ne
comparent point cette defence à des Ligues, Traittez & confederations,
lesquelles ont eu leur Cours de temps en temps
depuis l’establissement de la Monarchie ; Car lors que le
parlement à trauaillé à la reformation de l’Estat, le mal
estoit dans l’extrémité, & il eust esté sans remede si on eut
tardé dauantage d’y apporter la guerison, pour ce qui est de
la leuée des deniers, elle a esté seulement retardée & non
empeschée & les quatorze millions que le Cardinal Mazarin
a amassez depuis la declaration, font bien voir qu’elle
n’a point fait de tort aux affaires du Roy, & qu’au contraire,
elle y a beaucoup seruy, & les Partisans qui se pleignent
du parlement pour leur interest particulier pour voir que le
recouurement des deniers par eux auancez est reculé ne