Anonyme [1649], LA IVSTIFICATION DV PARLEMENT ET DE LA VILLE DE PARIS DANS LA PRISE DES ARMES ; CONTRE L’OPPRESSION & Tyrannie du Cardinal Mazarin. , françaisRéférence RIM : M0_1796. Cote locale : C_5_73.
page précédent(e)

page suivant(e)

-- 11 --

lecture d’icelle qu’elle n’estoit satisfactoire, mais captieuse
& pleine de fraude, comme estant son ouurage, en ce que
soulageant d’vn costé le peuple par la remise de quelque
partie des Tailles, d’vn autre elle l’opprimoit dauantage en
confirmant plusieurs droicts non verifiez, & speciallement
des droicts d’Entrée sur le Vin & autres Marchandises entrant
dans la Ville de Paris & autres Villes du Royaume, se
montant à de grandes sommes, contre & au preiudice d’vn
Arrest rendu le 20. dudit mois de Iuillet en la presence de
Monsieur le Duc d’Orleans, venu au Parlement de la part
du Roy & de la Reyne, portant reuocation de tous les droits
non verifiez, & entr’autres desdits droits d’Entrée ; Et qu’vn
nouueau Tarif seroit fait de tous les droits à prendre sur toutes
les Marchandises du Royaume : Enfin qu’elle n’apportoit
pas tous les remedes necessaires aux desordres presens, obseruez
par les cahiers des Deputés des Cours Souueraines, ny
le soulagemẽt que le peuple en esperoit, & qu’elle n’estoit le
fruict esperé & attendu des Conferences des Deputez des
Cours Souueraines auec Monsieur le Duc d’Orleans & les
principaux Officiers du Conseil : Il fust resolu en la presence
de mondit Seigneur le Duc d’Orleans, Que suiuant ledit
Arrest du vingtiesme dudit mois de Iuillet il seroit procedé
à vn nouueau Tarif ; & que pour le composer Messieurs de
Broussel & Ferrand Conseillers du Parlement se transporteroient
au Palais d’Orleans, où il a esté trauaillé plusieurs
iours en la presence de mondit Seigneur le Duc d’Orleans,
Monsieur le Chancellier & Mr le Surintendant des Finances,
Deputez de la Reyne pour vacquer à dresser ledit Tarif :
MAIS LE DIEV des Armées nous ayant donné vne signalée
victoire sur nos Ennemis, le Cardinal Mazarin au
lieu de receuoir ce bien du Ciel auec des reconnoissances
telles qu’il debuoit, & de s’en seruir pour procurer le soulagement
du peuple, Il s’en est seruy pour faire esclater sa colere
contre le Parlement, & elle luy a donné la hardiesse de
faire enleuer de la Ville de Paris pour vne seconde fois des
Officiers du Parlemẽt : Et entr’autres lesdits sieurs de Broussel
& Blasmeny, & en faire propscrire quelques autres ; Mais
le procedé duquel il a vsé pour paruenir à cette propscriptiõ
& enleuement merite d’estre consideré, & nous rappelle la


page précédent(e)

page suivant(e)