Anonyme [1652], LA HECATOMBE PROPHETIQVE, OV LES CENT CENTVRIES DE DOMPEDRO OLOSO, GENTIL-HOMME VENITIEN, ASTROLOGVE DE LA REPVBLIQVE DE VENIZE. , françaisRéférence RIM : M0_1620. Cote locale : B_13_71.
LA HECATOMBE PROPHETICQVE, où les cent Centuries de Dom Pedro Oloso Gentilhomme Venitien, Astrologue de la Republique de Venize ; Où l’on recognoistra l’heureuse entreprise de Messieurs les Princes, & la perte du Cardinal Mazarin. Presenté à son Altesse Royalle. Premier Centurie.
Dieu seul autheur de l’Vniuers, Pour vn temps permet la souffrance, Fortuné frappent de reuers, Pour nous donner congnoissance.
II. Centurie.
Malheur à luy qui reuient d’auanture, Ce sauuera du danger qui pourra, A dieu l’honneur adieu la Prelature, La voûte en terre bien-tost tombera.
III. Centurie.
Dedans la cinquiesme dixaine, Lon verra l’amoureux vinqueur, Remply d’vne flame diuine, Requerir la Paix & douceur.
|