Anonyme [1650], LA GENEALOGIE DV PRINCE. ET COMME TOVS CEVX DE cette Maison ont esté funestes au Roy & au Peuple. , françaisRéférence RIM : M0_1477. Cote locale : A_9_36.
page précédent(e)

page suivant(e)

-- 3 --

qui estoient dans l’Eglise de saincte Croix à Orleans,
& apres auoir pillé iusques aux Calices &
aux Ciboires, il fit démolir la maison du Seigneur,
au mespris de celuy à qui il deuoit toute sorte de
reuerence. Et pour ces sacrileges, & plusieurs autres
crimes, le Roy François II. le fit condamner
à auoir la teste tranchée. Mais heureusement pour
luy, il fut tué en l’an 1569. & ainsi il ne tomba pas
entre les mains de l’Executeur de la haute Iustice,
Son fils, suiuant les traces du Pere, pour auoir exercé
les mesmes impietez & les mesmes tyrannies
contre Dieu, contre la Religion & contre l’Estat,
fut empoisonné par sa propre femme, qui comme
vne autre Iudith donna le coup de la mort à ce
nouuel Holoferne, pour abreger le cours de ses Iubricitez
& des malheurs qu’il causoit en France.
Si bien que malgré tous les antidotes dont il se pût
seruir, il mourut six mois aprés qu’elle luy eut fait
aualer du poison pour s’en deffaire. Et pour punir
vne action si equitable, ceux de la Rochelle condamnerent
le Medecin & le Cuisinier à mort, à
cause qu’ils auoient seruy de moyen pour arriuer
à vne fin si glorieuse ; & la Princesse à vne prison
perpetuelle, qui estoit S. Iean d’Angely, où elle
accoucha de Henry, dit de Bourbon, pere de celuy-cy,
treize ou quatorze mois apres la mort de
ce miserable Prince. Cét Henry de Bourbon fut
esleué en la Religion Pretenduë Reformée auec
sa mere, iusques en l’an mil cinq cents nonante-six,


page précédent(e)

page suivant(e)