Anonyme [1649], LA DISGRACE DV CARDINAL MAZARIN ARRIVEE DEPVIS LA Conference de Ruel. , françaisRéférence RIM : M0_1156. Cote locale : C_7_55.
declarant le malheur ou son Maistre s’en alloit tomber, iusqu’a me dire qu’il estoit en tel mépris que l’on commençoit à le traitter de simple Monsieur sans Eminence : Ce qui me fait croire que nous sommes à la fin de nos maux, que nostre procez est gagné, & que nous sommes a la veille de nostre deliurance, puis que la cause de nos miseres est ostée, ou peu s’en faut que nostre partie est sans pouuoir, & que nostre tyran est luy mesme dans les fers qui nous ont si long temps captiuez. Ce n’est pas que i’ignore les pretensions de cette harpie, ie cognois le credit qu’il s’est acquis aupres de la Reyne qui luy a bien tant donné de pouuoir sur les peuples du Roy, qu’il a eu la hardiesse de signer les articles accordez à Ruel, cõme s’il eut esté le plus innocent du monde, iusqu’à vouloir contraindre les Deputez du Parlement à le faire Duc & Pair de France, mais ie sçay aussi qu’il a conté sans son hoste lors qu’il a crû forçant ces membres incorruptibles de l’Estat, faire sa paix auec la France dont la playe est trop recente pour n’en pas ressentir la douleur, & c’est pour ce sujet que le peuple plus que iamais, allume sa colere contre luy, resolu ou d’estouffer sa tyrannie ou de perir glorieusemẽt pour se guarãtir de ses atteintes.
| |||||