la mesme qui sont en liberté & en la iouissance de leurs
biens viuans d’vne vie tranquille, neantmoins aiment
mieux choisir vne vie laborieuse & fascheuse ? voire
mesme la perte de leurs biens, de leurs familles & de
leur propre vie soubs vne superbe & cruelle domination
du Prince tyran que de demeurer heureux.

Ce que nous apprenons du Prophete Samuel par la
bouche duquel Dieu parle ainsi au premier Liure des
Roys Chap. 8. V. 7. Escoute la voix du Peuple, car ils ne
t’ont pas deboutté mais moy, affin que ie ne regne sur eux, lors
qu’ils disent vers. 5. 6. ordonne sur nous vn Roy pour nous
iuger, comme ont toutes les Nations.

Le Prophete preuoyant les choses à venir, & que
le gouuernement des Roys à la parfin degeneré en
tyrannie leur dist, v. 11. 12. Tel sera le droit du Roy qui dominera
sur vous, il prendra vos fils, & les mettra en ses Chariots.
Il en ordonnera pour labourer les Champs & pour moissonner
les bleds, & pour former les armures & aussi prendra
de vos filles pour faire ses oignements, Verset 14. & prendra
aussi vos champs, & les vignes, & les meileurs lieux
des Oliues, & les donnera à ses seruiteurs, Verset. 15.
16. 17. &c.

Et pour les intimider dauantage d’vn futur desespoir
en leurs afflictions, il leur dist. Verset 18. En ce iour la,
vous crirez deuant la face de vostre Roy, que vous vous estes eleu
& le Seigneur ne vous exaucera point en ce iour la, pour ce
que vous auez demandé vn Roy pour vous Mais verset. 19.
Le Peuple ne voulut point ouyr la voix de Samuel : mais ils
dirent non : mais il sera Roy sur nous.

Mais ils ne furent longtẽps sans se repentir, car du Regne
de Salomon Roy d’Israël encore qu’il fut le plus
sage des Roys ce peuple parle ainsi à son Fils Roboam
son Successeur 3. Reg. Chap. I. Verset 4. Ton pere nous.
a imposé vn tres dur ioug, & ainsi toy maintenant diminuée
vn petit de la tres-dure seruitude de ton pere, & du tres pesant
ioug qu’il nous a imposé & nous te seruirons. Qu’auront donc
fai les autres Roys de la terre qui n’ont point eu la sagesse
de Salomon.