28. 252.

La troisiesme Race de nos Rois plus sages par l’exemple
de leurs Predecesseurs a duré 675 ans, iusques a l’an
present 1650. sous 30 Roys, Louys XIV. (que Dieu rende
heureux) à presẽt regnant. Adjouste les ans des deux
premieres Races, puis que ce n’est qu’vne Monarchie &
tu auras 1342 ans que desia a duré la Monarchie des François.

Restent donc 107 ans pour paruenir à la durée de l’Empire
des Babiloniens, auquel temps se trouue l’année
Chimaterique en multipliant 7. par 23. & le produit
par 9. qui est 161 à quoy il est bon de pouruoir par des
salutaires remedes en ostãt les causes des iustes plaintes
& mouuemens ciuils aduenus l’an precedent 1649. La
pierre fondamentale est bien posée, mais il y faut bastir
pour le bien public & ne permettre qu’elle soit ostée.

Vne puissante resistance sera necessaire, mais elle aura
le dessus en son temps pour acheuer comme elle a eu
pour commencer, nonobstant toute violence contraire :
les choses faites ou cõmencées ont souuent leur retour
pour estre accõplies ou acheuées cent ans apres ou enuiron.
La Ville de Bourdeaux se rebella l’an 1548 sous
Henry Il. à cause des Gabelles, dont elle fut chastiée,
L’an passé vn reflux de vexations la troubla : cõme aussi
Paris capitalle de tout le Royaume qu’elle a repoussé
auec plus de raison : le Duc d’Anguien remporta vne signalée
victoire en Italie sous François I. contre l’Empereur
Charles quint.

Cent ans apres le Duc de mesme Nom, à present premier
Prince du Sang, a signalé son extraction par vne
autre égale en Allemagne contre l’Empereur & ses
Alliez sous nostre Roy Louys XIV. à present regnant :
Robert Duc d’Anjou ayeul du premier Roy de la troisiesme
Race de nos Roys, posa vne ferme pierre pour
fondément de hauts desseins contre le Roy Charles le
simple, sur laquelle edifia prudemment Hues le grand
son fils pour mettre la Couronne Royale sur la teste de
son fils Hues Capet, enuiron cent ans apres.