Marigny, Jacques Carpentier de [?] [1652], TARIF DV PRIX DONT on est conuenu dans vne assemblée de Notables, tenuë en presence de Messieurs les Princes, pour recompenser ceux qui deliureront la France du Mazarin, qui a esté iustement condamné par Arrest du Parlement. , françaisRéférence RIM : M0_3752. Cote locale : B_11_16.
-- 6 --
A celuy qui se seruira d’vne arquebuse à
vent, pour le tuër commodément sans que
l’on puisse en entendre le bruit, dix mille escus.
A celuy qui chargera ses pistolets de poudre
blanche afin qu’il puisse executer facilement
l’entreprise sans estre découuert, la somme de
dix mille escus.
A celuy qui se glissant adroitement à sa suite,
lors qu’il se fera porter en chaise, luy tirera
vn coup de mousqueton par dessus l’épaule
du porteur, & se jettera pour se sauuer
dans la maison la plus proche, dans laquelle
on luy donnera retraite fauorable, pour auoir
seruy l’Estat vingt mille escus.
Au Canonier qui le voyant dans vne batterie,
mettra le feu dans vne barrique de poudre
pour le faire sauter, cinquante mille escu.
Aux fantassins ou cheuaux legers qui faisant
semblant d’auoir tiré par mégarde le tuëront,
vingt mille escus.
Aux Gens-darmes & cheuaux legers de
la Garde, ou autres qui lors que le Roy sera
à la chasse accompagné du Mazarin, donneront
à ce Sicilien le coup mortel dans quelque
fort ou faux fuyant, 50. mille escus.
|