A celuy qui dans l’approche des armées,
ou à quelque siege de Ville ; luy tirera
vn coup de pistolet, & se sauuera dans
les trouppes de Messieurs les Princes, ou
dans la place assiegée, la somme de quatre
mille escus, si c’est vn simple Caualier, &
dix mille escus si c’est vn Officier, & luy
seront expediées Lettres de Comte ou de
Marquis à son choix, dont Messieurs les
Princes solliciteront la verification dans le
Parlement, dans la Chambre des Comptes,
& dans la Cour des Aydes, sans qu’on
luy fasse valoir les Breuets de Mareschal de
Camp, & de Lieutenant General, dont il
sera gratifié.

A celuy qui ayant loüé quelque Maison
commode prés de celle du Mazarin, luy tirera
par la fenestre de son logis vn coup de fusil,
chargé de bales ramées, & empoisonnées, &
se sauuera en suite par vne porte de derriere,
sur vn bon cheual, qu’il aura soin de faire tenir
prest, la somme de six mille escus.

A celuy qui l’arquebusera lors qu’il sera
dans l’Eglise, chose qui ne doit donner aucun
remords de conscience, attendu la
Declaration de la Sorbonne, six mille escus