Anonyme [1652], LA DECLARATION DV CARDINAL MAZARIN ENVOYES A SON ALTESSE ROYALLE, A NOS SEIGNEVR LES PRINCES, & à Messieurs du Parlement, par vn Courier Extraordinaire, , françaisRéférence RIM : M0_895. Cote locale : B_12_19.
page précédent(e)

page suivant(e)

-- 3 --

LA DECLARATION DV CARDINAL
Mazarin, enuoyes à son Altesse Royalle, à nos
Seigneur les Princes, & à Messieur du Parlement,
par vn Courier extraordinaire, Sur les execrable Crimes
qu’il à commis contre Dieu, contre le Roy, & contre
luy-mesme.

C’EN est fait Messeigneur, mes execrables
crimes m’ont enfin rendu la Terre
& le Ciel ennemis, & si la vengeance des
hommes tourmente incessamment mon corps, la
haine de Dieu & son inimitié irreconciliable affligent
encore bien dauantage mon esprit. Tout est
en desordre & en confusion chez moy, & ie n’ay
pas en mon ame vne seule partie qui soit saine,
tout est pourry & cicatricé. Que mes apprehensions
m’espouuentent ! les fureurs me bourellent
à toute heure, & le bruit du tonnerre qui gronde
contre moy de tous costez, me fait craindre que
bien-tost mon corps ne soit liuré aux corbeaux, &
aux loups, afin de seruir d’vn exemple memorable
à la posterité.

I’entends sans cesse à mes oreilles mille plaintes
publiques, on m’appelle par tout le Tyran de la
France. Ceux-mesmes qui adorent le vice, me nõment
auec horreur le meurtrier d’innocens, le deserteur
des Estats, le faux Polytique, qui mets tout
en vsage pour m’agrandir à la ruine des peuples.



page précédent(e)

page suivant(e)