Puis tous leurs gages retranchez
Font qu’ils sont mal enharnachez,
Et qu’en leurs Cuisines & Caues
N’y a que du Cidre & des raues.
Encore c’est chose claire à tous
Qu’ils n’en mãgent pas tous leur saouls ;
Leur table en pauureté superbe,
Faict, qu’on dit en commun prouerbe,
Il n’est rien de si morfondu
Que la Cuisine d’vn Esleu,
Sans que de tel dire on excepte
Presidens, ou faisans recepte,
Qui n’ont sur si triste troupeau
Qu’vne voix plus & vn bureau.
Mais en laissant là leur mes-aize
Et si prolixe parenthese,
Vous remonstrent les Partisans
De toutes especes, DISANS,
Qu’ils ont appris à la mal-heure
Que Majesté, quoy que mineure,
Sans refléchir par elle assez
Dessus leurs seruices passez,
A creé Chambre de Iustice,
Pour que Financiers on punisse.
Mais pourtant c’est vn à sçauoir
Sy Regente a eu le pouuoir
De fulminer des bulles telles
A ses bons Suiects, si mortelles,
Car c’est en purs termes de droit
Tout ce que Majeur pourroit.
Ne tenant lieu que de Tutrice
Et de simple administratrice,
Qui ne peut rien sans nullité
Changer durant minorité.
Or ce faisant la bonne Reyne
Sans doubte le fondz alliene
Du Roy, nostre Maistre son Fils,
Qu’on sçait estre au rang des pupils,
Et qui est dans son indigence
Secouru de nostre finance

page précédent(e)

page suivant(e)