qu’il fit dõner par l’Ambassadeur de France pour l’eslection
de sa Saincteté. Depuis il continüa dans le libertinage, & donna
au jeu & aux intrigues le reste de son temps. C’est ce qui le fit connoistre,
& qui le fit rebuter du seruice d’Espagne par les Ministres
du Roy Catholique, qui ne trouuoient en lui ny vertu, ny sincerité
ny capacité, pour seruir dans les employs qu’il briguoit.

Il prit par despit le party de France, & ceux qui ont escrit la paix,
de Casals l’ont assez mal à propos loué pour luy complaire, de ce
qu’il y eut de bon heur. La fortune qui le conduisoit aueuglément
dans le piége où il doibt périr, luy prepara cette entrée en France,
où il fut bien receu du Cardinal de Richelieu ; qui ne put mieux
faire voir qu’il s’estimoit au dessus de la pourpre, que d’en reuestir
son valet. Ie l’appelle valet, car tout Paris scait comme il vesquit &
que ceux de la chambre du Cardinal de Richelieu luy faisoient
present de ses vieilles hardes pour les r’habiller, iusques à des souliers,
& des vieux gans. Il doit encor son Chapeau à l’aversion que
le mesme Cardinal auoit contre ceux de nos Euesques qui le pouuoient
meriter : Le Sieur de Chauigny Secretaire d’Estat dãs l’employ
des affaires estrangeres, qui l’auoit pris en affection, & qui le
reçeuoit tous les iours à sa table, y apporta des soins extraordinaires
dont nous auons veu la recompense dans la Regence d’aujourd’huy,
que l’on peut appeller, l’interregne des François, & l’Empire
du Sicilien.

L’Histoire ne perdra rien de la plainte de tout les peuples qu’il a
fait gemir dedans & dehors le Royaume, par la guerre qu’il a continuée
pour affermir son authorité, & vostre Altesse en entendra
parler, toutes les nations qui ne pourront que vous blasmer de l’auoir
voulu arracher des mains de la Iustice, & de luy auoir voulu
liurer la Iustice mesme, pour esteindre ce petit reste de la splendeur
de nostre ancienne Monarchie, que la tyrannie n’a pu offusquer.

Seroit-il bien possible que vous eussiez ignoré qu’il a fait les efforts
pour entrer au seruice de Monseigneur le Duc d’Orleans &
pour oster a la Reyne, à Mr. le Prince Pere de V. A. la part que le
feu Roy leur auoit donnée à la Regence du Royaume : Ce fut vn
valet à louer l’espace de quelque temps, tout le monde l’auoit en
horreur : Il n’y eut que Monsieur l’Euesque de Beauuais qui se laissa
surprendre par ses fourbes, qui l’ont esloigné de la Cour, & du Conseil