uos peres. Catherine de Medicis l’vne des plus sages & vertueuses
Princesses de son âge, n’auoit-elle pas, au dire des factieux de son
temps, fait mourir ses enfans l’vn apres l’autre, pour estre tousiours
Regente ? La defunte Reine Mere, aussi grandement vertueuse,
n’a-t’elle pas esté si publiquement blasmée de n’auoit pas assez soigneusement
recherché les autheurs de la mort de Henri le Grand
son époux qu’il luy fallut souffrir dans les articles de la Conference
de Loudun, que le parti contraire employast qu’on feroit la recherche
des autheurs de cet assassinat ?

L’Arrest que vous pretendez avoir donné sans exploit ny aucune
forme de iustice depuis vostre interdiction, contre ce Cardinal,
monstre assez que vostre haine vous rend incapables de connoistre
de ce qui le concerne c’est pourquoy ceux qui voudroiẽt parler en
sa faueur, ce que ie ne pretends pas ici, devroient choisir des iuges
moins passionnez : Mais il y aura bien peu de candeur en ceux qui
ne confesseront pas que c’est par sa trop grande douceur qu’il est
auiourd’huy persecuté : Aussi, ne vous plaignez vous pas moins des
autres que de luy, mais la difference est, que vous le craignez moins
que vous ne faisiez son predecesseur : qui a bien fait voir par les resnes
qu’il vous tenoit hautes, qu’il vous connoissoit mieux que luy
qui vous les a tant relaschées.

Il est vray que la charge des imposts a esté grande, mais elle ne
pouvoit estre gueres moindre en vn estat qui soustenoit seul la principale
despence que luy & tous ses Alliez ont faite en vne guerre de
14. ans contre l’Empereur, le Roy d’Espagne & tous leurs Confederez,
auec les prodigieux succez que tout le monde admire qui
meritoient d’autres complimens des François, qui en ont remporte
l’honneur, que des factions qui ont obligé leur Roy victorieux
de ses ennemis, à sortir de nuit de sa ville capitale, pour le iuste
soupçon qu’il auoit des siens : Ce que la posterité aura de la peine à
croire, & rougira pour ceux à qui cette ingratitude ne fera point
auiourd’huy de honte.

Et toutefois depuis la Regence, les tailles ont esté diminuées de
quinze millions, outre les 35 autres millions dont le peuple fut déchargé
l’année passée : ce qui n’a pas empesché qu’on n’ait remüé
Ciel & terre contre la Reine pour la rendre par là odieuse. Et quant
à ceux qui ont manié ces finances, ie ne pretends non plus parler à
leur iustification : il y a trop d’auersion contre eux par ceux mémes
qui ne les connoissent non plus que le paysan faisoit Aristides qu’il