DISCOVRS
SVR LE GOVVERNEMENT
DE LA REYNE DEPVIS
SA REGENCE.
IL y en a qui se plaignent du Soleil,
parec qu’en le regardant fixement,
leurs yeux ne peuuent souffrir l’éclat
de sa lumiere ; mais en fin il
n’en arriue autre chose, sinon que
par vne juste punition les vns en
sont aueuglez, & les autres du
moins en sont ébloüis ; aussi tous ceux qui osent parler,
ou écrire contre la Reyne, au lieu d’honorer sa vertu, ne
doiuent pas moins attendre de leur temerité, que d’estre
accablez d’vne confusion eternelle. Ne pas suiure les
loix de sa Souueraine, c’est n’auoir point de Prudence ;
prendre plaisir à contredire ce qu’elle fait, c’est ne pouuoir
temperer ses passions ; ne pas vaincre l’aduersion
interessée qu’on a pour elle, c’est n’auoir point de generosité ;
& ne luy rendre pas le respect qu’on luy doit,
c’est n’auoir point de justice : & par consequent ces Esprits
n’ayans pas toutes ces vertus ; on peut dire qu’ils se
doiuent plus mettre en peine de corriger leurs crimes,