Le Dru, Nicolas [signé] = Laffemas, abbé Laurent de [?] [1649], LETTRE A MONSIEVR LE CARDINAL, BVRLESQVE. , françaisRéférence RIM : M0_1813. Cote locale : C_4_40.
Ha ! que s’il m’eust esté facile, Quand vous estiez en cette ville, De vous aborder quelque fois, Et vous parler de viue voix, Vous seriez encore à vostre aise, Et n’auriez point fait des fadaize, Pourueu que mes petits auis Eussent par vous esté suiuis. Mais il nous estoit impossible, Vous estiez tousiours inuisible, Et l’on pouuoit mettre en escrit Dessus vostre porte, Cy git ; Cependant qu’en vostre Antichambre Où fumoit le Iasmin & l’Ambre, L’Intendant, & le Cordon bleu Pestoient ensemble aupres du feu, Sçachant bien que pour toute affaire, Soit importante, ou necessaire, Vous teniez en main le cornet, Ou railliez dans le Cabinet, Auec Bautru, Lopes & d’autres, Qui sont bien d’aussi bons apostres, Et deux Singes sur vos genous, Qui dansoient par fois auec vous. Ce n’est pas viure à nostre mode, Le François a d’autre methode, Et vous n’auriez pas fait tant mal D’imiter le feu Cardinal, Dont le discours & le visage Gagnoient le cœur du plus sauuage, Donnant au monde tour à tour Vne audience chaque iour. Vous deuiés imiter cet homme, Et ioindre l’addresse de Rome
|