Laffemas, abbé Laurent de [?] [1649], L’ENFER BVRLESQVE, OV LE SIXIESME DE L’ENEIDE TRAVESTIE, ET DEDIÉE A MADAMOISELLE DE CHEVREVSE. Le tout accommodé à l’Histoire du Temps. , françaisRéférence RIM : M0_1216. Cote locale : C_4_3.
Au milieu d’vn œuure si rare L’on cherche la place d’Icare, Mal-heureux fils qui fut si fou, De vouloir se casser le cou ; Dedalle auoit ja burinée La moitiée de sa destinée, Par deux fois l’ouurage laissé, Et par deux fois recommancé ; Il entreprenoit de poursuiure, Quand sa main tombant sur le cuiure, Le bras luy restant entrepris, Son art fut court contre son fils, Et le Peintre se trouua pere. Ce que mon Heros considere, Et d’autres figures auprés, Comme s’il y venoit exprés, Quand son Achatte le fidelle Le releua de sentinelle, Il l’auoit enuoyé deuant Chercher les Moines du Conuent, Auec luy s’en vint Deiplobe, Traisnant sans doute longue robe, Car la Prestresse d’Apollon La doit porter iusqu’au talon, Hé quoy, dit-elle, fils d’Anchise, Quelle contenance à l’Eglise, De bayer aprés vn Tableau ? Pensez-vous que cela soit beau : C’est ce que feroit vne femme, Les enfans dedans nostre-Dame, Deuant sainct Christophle à Paris, Ne semblent pas plus ahuris, Et les badauts qu’on nous enuoye, Le sont biẽ moins que ceux de Troye[illisible] Si vous tenez les bras croisez, Ie vous feray mettre aux aisez ; Et vous & vos gens sire Enée, Employez mieux cette iournée, Qu’on cherche sept petits Taureaux, Qu’on les prẽne dans les trouppeaux, Que l’innocence & le bas aage A faits exempts du labourage ; Vous voilà tous bien ébobis, Il me faut autant de brebis Qu’on choisira selon la mode, Qui ne soient vieilles comme Herode, Eu suitte on doit les immoler, Elle fit tréve de parler. Le grand Æneas ne s’oppose, Fort prest à faire toute chose, Iusqu’à suiure comme vn barbet La Dame qui signe luy fait, Et portant deuant la lanterne, Le meine dans vne cauerne.
Vn grand pan qui sembloit creusé, Soit que l’on s’y fut amusé, Naturel, ou fait auec pelle, D’vn rocher qui Cume s’appelle, S’ouure par trois differents trous, Et l’Oracle respond par tous. On estoit proche de cét antre, Desia presques mon Heros entre, Quand la Sybille qui parla, Dit d’vne voix rude, alte-là,
| |||||