Les intrigues de la Paix & les Negotiations faites à la Cour par
les amis de Monsieur le Prince, depuis sa retraite en Guyenne
jusques à present.
IN continent apres la retraite de M. le Prince en Guyenne &
mesme auparauant le retour du Cardinal M. l’on commença
les commerces, qui depuis n’ont point esté discontinuez par
les amis de M. le Prince & de sa part, soit pour le retourdu C. M.
dans le Royaume soit pour son restablissement dans le Ministere.
Ceux qui eurent lors connoissance des negotiations & des voyages
qui se firent à Cologne par les amis de M. le Prince, voulurent
se persuader que toutes leurs allées & venuës n’estoient que
des pieges, & que ce party ne souhaitoit le retour du Cardinal que
pour en tirer ses aduantages & pour reunir à soy tous les esprits
par la haine que l’on a contre sa personne : mais la suite du temps
a bien fait cognoistre que la continuation de toutes ces intrigues
auoit pour fin quelque chose de plus sensible & de plus caché, &
que l’on esperoit apres le retour du Mazarin tirer des aduantages
considerables de sa foiblesse, & le faire à la fin consentir à toutes
les pretentions particulieres pour lesquelles seules l’on auoit rompu
auec luy.
Le premier qui se mesla de porter des paroles de M. le Prince à
la Cour de Cologne, fut le nommé Gouruile, autrefois laquais
du Duc de la Rochefoucaut, & depuis le principal Confident de
Madame de Longueuille, lequel vint d’abord à Paris comme enuoyé
de Monsieur le Prince à son A. R. pour mieux couurir par
cét employ les ordres secrets dont il estoit chargé. Il paroissoit
dans le public en cette qualité sous l’adueu d’vne lettre de Creance
que les amis de Monsieur le Prince dresserent icy sur des blancsignez
qu’ils auoient de luy : il entretenoit mesme tous les iours
Monsieur, pendant qu’à d’autres heures il auoit des conferences
plus intimes & plus secrettes chez le sieur de Bordeaux Intendant
des Finances auec Ondedei qui y estoit caché. Ils arresterent ensemble
vn voyage vers le Cardinal Mazarin qui fut fait peu apres,
& dans lequel Gouruille luy fit esperer que Monsieur le Prince ne