mais la suite du temps a bien fait cognoistre
que la continuation de toutes ces intrigues
auoit pour fin quelque chose de plus sensible
& de plus caché, & que l’on esperoit apres
le retour du Mazarin tirer des aduantages considerables
de sa foiblesse, & le faire à la fin consentir
à toutes les pretentions particulieres, pour
lesquelles seules l’on auoit rompu auec luy.

Le premier qui se mesla de porter des paroles
de Monsieur le Prince à la Cour de Cologne, fut
le nommé Gouruille, autresfois laquais du Duc
de la Rochefoucaut, & depuis le principal
Confident de Madame de Longueuille, lequel
vint d’abord à Paris comme enuoyé de Monsieur
le Prince à son A. R. pour mieux couurir par cet
employ les ordres secrets dont il estoit chargé.
Il paroissoit dans le public en cette qualité sous
l’adueu d’vne lettre de Creance que les amis de
Monsieur le Prince dresserent icy sur des blanc-signez
qu’ils auoient de luy : il entretenoit mesmes
tous les iours Monsieur, pendant qu’à d’autres
heures il auoit des Conferences plus intimes
& plus secrettes chez le sieur de Bordeaux
Intendant des Finances auec Ondedei qui y
estoit caché. Ils arresterent ensemble vn voiage
vers le Cardinal Mazarin qui fut fait peu apres,
& dans le quel Gouruille luy fit esperer que Monsieur
le Prince ne s’opposeroit point à son retour