LA CONFERENCE SECRETTE DV CARDINAL
Mazarin auec le Gazetier, enuoyée de Bruxelles le
7. May dernier.
Le Cardinal Mazarin.
MONSIEVR Renaudot mon bon amy, c’est maintenant
plus que iamais que i’ay besoin de tes inuentions & de ta
plume, tu vois l’estat où ie suis reduit, tu vois l’orage qui
s’est esleué, il ne faut pas de moindre addresse que la tienne pour en
détourner l’effort, sans lequel ie ne puis que perir, s’il vient à
fondre.
Gaz. Monseigneur, Ie croy que V. E. me iouë à son ordinaire,
mais par vne nouuelle inuention. Elle ne fut iamais si puissante ;
iamais honorée auec tant de respect, elle ne fut iamais si bien qu’elle
est dans l’esprit de la Reyne : les Princes ne vous furent iamais si
sousmis ; les Parlements si obeyssans : les peuples si deuots & affectionnez,
& vous auez tous les sujets du monde d’estre content,
ou il faut dire que le contentement ne se peut pas trouuer en
ce monde.
Le Card. Renaudot tréve de compliment, ces flatteries ont esté
bonnes durant quatre ou cinq ans, pendant lesquels tout ce que tu
viens de dire m’estoit vn grand motif de gloire & de satisfaction :
i’estois monté sur le fais de la grandeur, i’auois la conduitte & les
biens de toute la France en ma disposition, & toute l’Europe me
regardoit comme vn Dieu, & l’arbitre de la paix & de la guerre.
Mais à present la chance est tournée, ceux qui n’osoient me louër,
crainte de n’en dire pas assez, ne trouuent pas d’iniures assez atroces
pour me charger sans aprehension d’en estre repris : mon Nom
est la farce d’vn peuple, qui auparauant ne le prononçoit qu’à genoux :
& pour des comedies dont i’ay diuerty la curiosité des Parisiens,
il n’est pas fils de bonne mere qui ne voulust donner de l’argent
pour assister à la tragedie de ma propre personne.
Gaz. Monseigneur ce n’est pas le bruit commun, V. E. n’ignore
pas qu’il ne me seroit pas caché, tous ceux qui me donnent des
aduis sont gens d’honneur, & qui sçauent tout ce qui se passe
de iour & de nuit : I’ay mes enfans à Paris qui voyent les meilleures