vn esprit fortement préocuppé, de s’opposer d’abord au principal
motif de sa fougue, vne populace émeuë ne s’amuse pas à resonner.
Il falloit plutost témoigner d’estre de leur party, dire qu’ils
auoient raison de faire ce qu’ils faisoiẽt, & encor d’auantage, & puis
leur montrer auec douceur que le chemin qu’ils prenoient estoit
dangereux, dont neantmoins ils n’estoient pas à blasmer, sur tout
il ne falloit nommer personne, & encore moins parler d aucun interest
en particulier. Lors qu’on veut mentir adroitement il faut
tousiours parler en general, & à la façon des oracles, & de vous
autres Medecins ; en sorte que quoy qu’il arriue vos parolles se
trouuent veritables. Le sujet des baricades estoit encore trop auant
dans l’esprit des bourgeois pour entreprendre de dire du mal
de Broucel, ny de Blanmeny : le Coadiuteur est en trop bonne estime
pour luy imposer cette impertinence. Tu deuois plutost parler
de ceux que tout le monde sçait estre de nostre party dans le Parlement,
dont le nombre n’est pas petit : tu deuois faire des impretions
contre les Financiers & les Partisans, & iurer que i’estois prest
de les exterminer. Cela sans doute auroit fait, que le Bourgeois
changeant en amour les mouuemens d’aversion qu’il a contre moy,
m’auroit offert sa personne & ses armes pour cette fin, à laquelle
tu sçais qu’il aspire il y a si long-temps, & auec raison : & nous vsant
adroitement de cette occasion, au lieu de les amener chez les partisans,
les aurions conduits la teste baissée dans le Palais pour enleuer
ceux qui s’opposent à nos desseins. & les traduire à Montargis,
sans leur faire quant à present autre mal, souz pretexte de la
seule authorité du Roy, & du repos de l’Estat. De cette maniere
l’affaire auroit pû reüssir, & parce moyen nous serions venus à bout
de tous nos desseins : car nous aurions mis tant d’imposts & surimposts,
que nous aurions voulu : nous aurions tãt fait de miserables
sous le beau nom d’aisez, & de sous-aisez, que personne n’en auroit
esté dispensé, si non ceux de nostre cabale, & tout cela sans crainte
d’opposition de la part de Paris, n’ayant plus de Parlement, ny
de resistance dans les Prouinces, où nous aurions restably les Intendans
& les Fusiliers. Ainsi voila vne belle occasion perduë, &
qui peut-estre ne reuiendra point : mais qu’as-tu fait en suitte, apres
ce premier coup au vent ?

Gaz. Apres auoir depeint les plus zelez du Parlement, & les
Generaux auec des couleurs d’interests si odieuses qu’elles faisoient
horreur : ie me mis à tracer le portrait de V. E. auec
des traits si doux & si agreables, que ie ne croyois pas qu’il y eust