Anonyme [1649], LA CONFERENCE DV CARDINAL MAZARIN AVEC LE GAZETIER, Iouxte la coppie Imprimée à Bruxelles. , françaisRéférence RIM : M0_742. Cote locale : C_1_19.
page précédent(e)

page suivant(e)

-- 6 --

exterminer ces gens de chicane, comme vne troupe de seditieux :
& si tu peux en venir à bout, comme ie n’en doute point,
pourueu que tu employes de la bonne ancre, ie te promets de
donner à tes deux enfans Medecins, les deux premieres charges
de premier Medecin du Roy & de la Reyne, quelque bonne mine
que ie fasse à Vautier, & au troisiesme vne charge de President au
Mortier, où à la Chambre des Comptes, à ton chois ou au sien, &
cela foy de Prince par naissance, de fauory sans égal, & de Sicilien
sans pareil.

 

Gaz. Monseigneur, i’ay trop d’obligation à V. E. de tant d’obligations
qu’elle me procure & à mes enfans, encore qu’elle en
ait bien donné à d’autres, & offices & benefices, aussi infames que
moy, & qui ne le meritent pas mieux ; mais ce n’est pas le bien ny
les charges qui soient capables de me charmer, non plus que par
le passé. C’est le seul interest de l’honneur & la gloire de seruir
vne personne de vostre merite, à laquelle on peut donner auec plus
de sujet que n’a pas fait celuy qui a fait l’inscription du cheual de
bronze, au defunct Cardinal de Richelieu, le titre superbe & fastueux
de Prince, dons l’esprit, la generosité & les merites surpassent
celles de ceux qui l’ont precedé. Mais V. E. sçaura s’il luy
plaist, que ie me trouue bien empesché, & comme au bout de mon
latin ; car i’ay fait tout ce que vous venez de dire, & beaucoup au
de-la, & si cela n’a de rien profité, sinon qu’à aigrir d’auantage les
esprits : si l’on ne veut dire que c’est comme vne meche allumée,
pour faire joüer vne mine, dont le feu n’est pas encore venu iusqu’à
la poudre, à quoy ie ne voy pas grande apparence, & ie crains
bien fort que cela ne seruira qu’a vous faire moquer & hayr dauantage,
& à me preparer vn Salue Regina, où l’on fait le feu de ioye la
veille de la S. Iean, si vous ne venez à bout du Parlement.

Le Card. Et qu’est-ce que tu as fait, qui nous doiue mettre l’vn
& l’autre dans vn commun ou reciproque desespoir ? I’ay eu tant
de troubles d’esprit, tant d’ordres à donner, tant d’affaires à démesler,
que c’est vn miracle, comme i’ay subsisté jusques à present :
car il ne m’a pas seulement fallu pouruoir à la seureté de ma personne ;
mais à gagner ou à conseruer tous ceux qui me sont necessaires,
& dont ie ne me puis passer. I’ay eu toutes les peines du
monde à retenir l’esprit de Monsieur le Duc d’Orleans, & pour l’endormir,
il a fallu arrester le bruit & le cours de la Riuiere auec vne
Abbaye, & des pieds d’argent, faute d’autre matiere. Pour Monsieur
le Prince, comme il ne dort point, il est semblable au dragon,



page précédent(e)

page suivant(e)