Anonyme [1649], LA CONFERENCE DV CARDINAL MAZARIN AVEC LE GAZETIER, Iouxte la coppie Imprimée à Bruxelles. , françaisRéférence RIM : M0_742. Cote locale : C_1_19.
page précédent(e)

page suivant(e)

-- 36 --

comme à vn mal desesperé, on neglige d’y apporter aucun remede.
Or parmy ceux que la memoire & l’experience me pourroient
fournir, si i’auois le loisir d’y penser : i’en voy deux quant à present,
qui ne me semblent pas inutiles, ny à reietter. Le premier,
seroit de mettre de la jalousie & de la diuision entre Monsieur le
Duc d’Orleans, & Monsieur le Prince, & auoir Monsieur d’Orleans
de vostre costé, par ce moyen vous agiriez souuerainement
sous le nom & l’authorité du Roy, dont Monsieur le Prince estant
priué, vous le feriez passer pour criminel de leze Majesté & perturbateur
du repos public, ce qui estant ioint auec l’auersion que
les peuples ont conceu contre luy, à cause des violences qu’il exerce
autour de Paris, il ne seroit pas en estat de vous faire de mal, si ce
n’est par quelque effort à la derobée, dont vous sçaurez bien vous
donner de garde.

 

Le Card. Oüy. Mais tu ne dis pas que pour estre Maistre de Monsieur
d’Orleans, il faut auparauant l’estre de la riuiere, & tu sçais
que i’ay encor plus d interest de me defaire de ce faquin, qui veut
aller de pair auec moy, que du Prince, lequel par les conditions
de sa naissance pourra estre plus sensible à la generosité, & à la clemence
en quelque estat que ie me trouue, que ne seroit pas ce maraut
s’il auoit l’aduange sur moy. Ioint que ie ne fais pas grand
estat de l’appuy de son maistre : chacun sçait de quelle façon il a
laissé perir honteusement ceux qui se sont voulus attacher trop
fortement à ses interests, qu’il a contribué à leur ruyne, & decouuert
les secrets qui les pouuoient rendre criminels. Quelle apparence
qu’il se mette beaucoup en peine pour me conseruer, puis
qu’il s’est abandonné luy-mesme en abandonnant ceux qui le seruoient ?
Ainsi, voyla ton premier emplastre plus chetif que ceux
des charlatans du Pont-neuf, puis que le nom mesme n’en vaut
rien. Voyons le second s’il sera meilleur.

Gaz. Oüy, Monseigneur, il est meilleur, & infaillible, & d’autant
plus asseuré qu’il n’a iamais manqué de produire son effet,
quand il a esté bien appliqué, & qu’il est generalement approuué
de tout le monde, si ce n’est de V. E. C’est qu’il faudroit faire la
paix generale, & donner le repos à la Chrestienté, qu’elle souhaitte
il y a si long-temps. Ce remede est indubitable, & seul capable de
vous maintenir à la Cour, s’il y a lieu pour vous de demeurer en
France. Car encore que vous ne soyez, ny Roy, ny Regent, quelque
authorité que vous donniez à vostre ministere : L’on sçait bien



page précédent(e)

page suivant(e)