A. L. [signé] [1652], LA GENEALOGIE DV PREMIER PRESIDENT. , françaisRéférence RIM : M0_1476. Cote locale : B_19_30.
page précédent(e)

page suivant(e)

-- 6 --

que vostre Majesté luy donne en qualité de son
premier President, il fait injustice à tous vos
subjets ? Et ne peut on pas encore adjouster
auec la mesme verité, que pechant dans le
Ministere de l’Estat & la garde des secrets que
vostre Majesté luy confie, il trahit son Prince,
& l’Estat, & deuient coupable d’vn crime aussi
grand que les effets en sont dangereux & les
suittes pernicieuses : Et cependant, SIRE, ie
ne feindray point de dire à vostre Majesté que
Mathieu Molé s’est si mal gouuerné en la qualité
de pere & de premier President, qu’elle
n’en doit rien esperer de bon en celle de Ministre
d’Estat, & d’associé à ses Conseils, mais
plustost elle doit craindre que ce miserable pere
& ce Magistrat tres injuste, ayant si outrageusement
abusé de sa puissance, au respect de ses
enfans & à l’égard de vos subjets, il n’en fasse vn
aussi mauuais vsage dans le Ministere de l’Estat,
& l’exercice de la premier charge du Royaume.
Car si V. Majesté, SIRE, prend la peine découter
la voix du peuple (qui est celle de Dieu quãd
elle est vniuerselle & vniforme, & non produite
par la haine & passion de quelques particuliers,)
elle sçaura d’elle que tout ce qu’vne molle
indulgence, tout ce qu’vne complaisance flateuse,
tout ce qu’vne passion aueugle & vne
affection idolatre, peut produire de mauuais &


page précédent(e)

page suivant(e)