ORDRE ET REIGLEMENT
pour les Gens de guerre.
PREMIEREMENT, AVONS ordonné & ordonnons,
que tout soldat entrant à nostre seruice fera serment de seruir
trois mois sous le Capitaine, sous lequel il fera monstre, &
les Capitaines ne suborneront les soldats les vns des autres,
ny ne les retireront en leurs compagnies, sans voir leur congé
par escrit du Capitaine qu’ils laisseront, sur peine d’estre priuez pour ce
mois de leur estat, applicable au Capitaine dont ils partiront, auec obligation
de les rendre & renuoyer à leur enseigne.
2. Apres la monstre faite, le Capitaine ne pourra donner congé au soldat,
iusques à la fin des trois mois susdits.
3. Le soldat qui partira sans congé par escrit, sera passé par les picques, ou
harquebuzé, selon les armes qu’il portera, & en demandant congé auec
l’occasion, quinze iours auant la fin desdits trois mois, le Capitaine sera tenu
le luy donner & signer : autrement luy sera donné par le Colonnel ou
Maistre de camp, à qui le soldat aura recours.
4. Quand les bandes deslogeront de lieu en autre, le soldat ne pourra changer
n’abandonner son Capitaine, sur peine (si c’est dans les 3. mois) d’estre
passé par les picques : & si c’est à la fin, sera mis en prison l’espace d’vn mois,
& incapable de pouuoir estre receu de nul Capitaine, trois mois apres.
5. Les armes que le soldat aura joüez, seront confisquez à son Capitaine,
qui les pourra prendre où il les treuuerra, estans perdues, tant pour celuy
qui les aura ioüées, que pour celuy qui les gagnera : & si sera mis le perdant
huict iours entiers en prison.
6. Le soldat qui vendra ou engagera ses armes, elles seront confisquées au
Capitaine, ainsi que dessus.
7. Le Soldat qui faudra à la faction, sans licence de son Capitaine, ou autre
excuse legitime, sera passé par les picques.
8. Le soldat qui ne se trouuerra aussi promptement à vne alarme, ordonnance,
ou autre affaire, comme son enseigne, sera passé par les picques.
9. Le soldat qui sans excuse legitime abandonnera le guet, escoute, ou autre
lieu où son Sergent l’aura mis, sera passé par les picques.
10. Le Sergent Major sera obey des Capitaines, Officiers & soldats, en ce
qu’il commandera pour son office, & ce sur peine (si c’est du Capitaine ou
Officiers) d’estre puny arbitrairement du Colonnel, si c’est soldat, de demander
pardon au Roy, audit Colonnel, & audit Sergent, deuant toutes les
compagnies, & d’estre despoüillé & desgradé de toutes armes, & banny des
bandes.
11. Celuy qui iniurira ledit Sergeut Major en faisant son office, s’il est Capitaine,
sera puny arbitrairement par le Colonnel : & s’il est soldat, sera
passé par les picques.