Savignac,? de [signé] [1652 [?]], LETTRE DE CONSOLATION POVR MADAME LA DVCHESSE DE NEMOVRS. , françaisRéférence RIM : M0_1925. Cote locale : B_14_18.
page précédent(e)

page suivant(e)

-- 10 --

& de sa souueraine Prouidence. Ie sçay bien,
MADAME, que quand le Ciel voudroit reparer
vostre perte d’vn Empire, il vous donneroit
bien moins que vous n’auez perdu. Il faut
donc renforcer vostre courage pour combatre cette
grande affliction, & pour la supporter genereusemẽt.
La Philosophie Chrestienne nous apprend vn remede
qui est souuerain pour la vaincre ; c’est de prendre
tout de la main de Dieu, & croire que rien ne
nous arriue que par sa permission & pour nostre
bien, nous ne pouuons douter de cette verité, sans
démentir la verité mesme ; Prenez cette raison du
Ciel pour vous bien resoudre, qui est, que Dieu le
veut ainsi. Si vous la goustez, MADAME,
vous essuyerez vos larmes, vos souspirs cesseront,
& vous tirerez de grands aduantages de vostre
disgrace, & vous verrez clairement que Dieu
vous a conduite de sa main dans cette charmante
retraite pour parler à vostre cœur : Escoutez-le,
s’il vous plaist, & soyez delicate à sa voix ; Si vous
prenez bien vostre apoint. Ie vous vois chargée de
Diadesmes & de Couronnes qui ne flaitriront iamais,
dont les fleurs & l’odeur dureront tout autant
que les Siecles ; Il faut donc cherir vn entier
détachement de toutes les choses perissables, puis que


page précédent(e)

page suivant(e)