traiteront-ils point sans vous’ ? serez-vous dédommagez
de toutes vos pertes ? & ce peu qui vous reste sera-il
conserué par vos armes ? Pauure peuple, qui t’expose
iournellement à la peste & à la famine, en faueur d’vne
ingrate grandeur dont tu as esprouué si souuent, ou
l’inconstance ou l’infidelité : Vse de ta raison ou de ton
experience : Ne crois plus ces Superieurs interessez ou
corrompus, qui t’engagent à les seruir pour se degager
de leurs temeraires entreprises. Ne vois tu pas bien
que le Parlement se degage le plus adroittement qu’il
peut, d’vne liaison qu’il auoüe auoir mal faite, & que
les mieux sensez pratiquent sourdement leur accommodement,
pour se liberer de la punition qui pend
sur la teste des mal-heureux, ou des coupables, & dont
la foiblesse ou l’indifference des Princes ne les tirera
iamais.

Ie ne parle point en faueur de qui que ce soit : Et si
tu fais reflexion sur la verité de ce que ie te dis, tu verras
bien que l’Esprit de Paix parle par ma bouche, & que
cét auis est également sincere & veritable. C’est à toy
d’en profiter & de regler là dessus tes mouuemens &
tes pensées.

Demande la Paix, pour iouyr ou du fruit de ton trauail
& de tes peines, ou du biẽ de tes guerres. Demande
le Roy pour l’asseurance & le sacré gage de cette Paix,
la prompte punition des coupables & des interrupteurs
de la Paix, qui ne veulent que la confusion pour pescher
en eau trouble, & se rendre importans & redoutables
à tes despens. Qui ont eux-mêmes fait venir le