que vous avez veuës, jusques à se sousmettre d’estre instruit au
point de la créance qu’on lui vouloir faire embrasser & consentir
en ses Royaumes, & les prier de suppléer à son insufisance, qui
ne paroissoit pas neantmoins dans ses responces : l’armée Angloise
commandée par le Général Fairfax, & de laquelle Cromvvel
estoit Lieutenant général, composée du parti des Indépendans, se
servant de l’intelligence qu’elle avoit avec plusieurs membres de
la maison des Communes ou Chambre basse, de mesme parti
qu’eux & entiérement oposez au parti Presbytérien, duquel estoyent
presque tous les Seigneurs de la Chambre haute & la plus
grande partie de la basse : Cette armée voyant que le parti Presbytérien
emportoit à la pluralité des voix qu’on achevast le traité
fait avec ce Roy, & estoit disposé à le restablir en son throsne,
à la charge de signer le Convenant : elle envoya s’asseurer de sa
personne, sous prétexte de le vouloir restablir sans l’obliger à ce
Convenant qu’elle soustenoit estre contraire aux loix fondamentales
du Royaume d’Angleterre, & de vouloir faire chastier
les Presbytériens, pour avoir voulu innover au gouvernement
de l’Estat, & imposer des loix contraires à l’authorité de leur
Roy : excusant l’attentat qu’elle avoit fait en se saisissant de sa
personne, sur la crainte que cette armée disoit avoir, que les Presbytériens
ne s’en emparassent les premiers : & en mesme temps
envoya vne Déclaration aux deux Chambres, desquelles les
Estats généraux sont composez, à sçavoir, pour parler a nostre
mode, de la Noblesse & du tiers Estat, depuis qu’ils en ont exclus
les Evesques ou le Clergé.

Cette Déclaration, qui avoit esté précedée par la requeste d’vn
seul régiment pour essayer comment elle seroit receuë, tendoit
à faire remettre le Roy dans ses droits & honneurs s’il se trouvoit
innocent, mais aussi (clause estrange & qui aporta vn grand
estonnement à tous ceux qui n’estoyent pas de la faction de ceste
armée) que son procez lui fust fait & parfait comme à vne
personne privée, s’il estoit coupable : soustenant que le mesme
traitement devoit estre fait au Prince de Gales & au Duc
d’York ses enfans : lesquels à faute de comparoir seroyent déclarez
inhabiles à succéder à ses Estats : l’armée ne donnant que
quatre jours ausdits Estats d’Angleterre pour résoudre l’exécution
de cette Déclaration : Lequel terme n’estant pas encor
expiré, elle se saisit avec les 25000 hommes dont elle estoit composée,
des principaux postes de Londres, & des le lendemain
s’estant aussi emparée des avenuës de Vuestminster, où se tenoyẽt