PROPOSITIONS ET LES
MOTIFS PRESENTEZ A NOSTRE
SAINT PERE LE PAPE Innocent X. du nom,
en cette année Sainte de Iubilé 1650. Par le Reuerend
Pere IEAN ROÉ, Carmelite Hybernois.

En faueur de Charles second Roy de la Grand’Bretagne,
d’Ecosse & d’Hybernie.

Pour son establissement & conseruation de la Religion
Catholique, Apostolique & Romaine
en ses Estats

Copie extraicte de son Original, & collationnée.

TRES SAINCT PERE, le present Orateur en toute
humilité desire de vous monstrer, que la cause principale &
occasion de ce Rigicide tyranniquement commis en la personne
de Charles I. Pere de Charles II. par ses rebelles & cruels
Subjets, & dont depuis le commencement du monde, on n’a oüy ny
entendu parler d’vn semblable, non pas mesme entre les barbares,
non plus que parmy les nations ciuiles ; n’ont esté autres que les graces,
faueurs & permissions qu’on a souuent & en diuerses façons concedées
& octroyées, tant au Royaume d’Angleterre qu’en celuy
d’Hybernie, non seulement à la Religion Catholique, Apostolique
& Romaine, mais aussi à ses Confirmateurs & Protecteurs.

La verité dequoy ne prouient d’autre motif, qu’à cause que ledit
Charles I. auroit donné plain pouuoir & authorité par diuerses
Commissions au Marquis D’Eormond, d’affermir & accomplir toutes
les conditions certaines & auantageuses pour la foy Catholique

page précédent(e)

page suivant(e)