N. I. T. / Jamin, Nicolas [?] [1649], LES GABELLES ESPVISEES A MONSEIGNEVR LE DVC DE BEAVFORT PAR N.I.T. , françaisRéférence RIM : M0_1462. Cote locale : A_3_75.
page précédent(e)

page suivant(e)

-- 5 --

estions en grand peril, lequel s’en estant allé dãs les
païs du Maine, Touraine & Anjou, où il c’est saisi
de toutes les Gabelles, & principalement de celles
de Tours, ou tout le menu peuple ne desire autre
chose qu’vne reuolte generale, l’a où les Soldats
ne pouuant s’empescher de ioüer de la Harpe,
leur instrument ordinaire, ils ont tellement empesché
le traficq qu’on ne faisoit aucune chose dans la
ville de Tours, ce que voyant le menu peuple, &
principalement les ouuriers en soye qui ne faisoient
aucune chose que de songer là où ils trouueroient
dequoy viure, ils s’assemblerent donc
plusieurs auec des Mariniers iusques au nombre
de 200. & allerent à Nantes querir du sel, & en
amenerent telle quantité qui ne valloit que 30. sols
le boisseau rendu à Tours, ce qui faisoit grand
tort au Roy, d’autant que plusieurs ont vendus
iusques à leur vaisselle pour en acheter, & en faire
des magasins. Ce qu’ayant esté proposé au Roy,
à la Reine Regente, & tout le Conseil, on a faict
expresses defences d’y retourner dauantage à peine
de la vie, & que pour ce faire on commetteroit
des Gardes sur les chemins pour empescher lesdits
Faux sauniers d’aller dauantage à Nante : Vous
sçauez que l’enuie est vne chose qui se rencontre
fort souuẽt dans les hõmes, & principalement dãs
ceux qui n’ont point de bien, & comme le bruit de


page précédent(e)

page suivant(e)