Morgues, Mathieu de [1643], LES DEVX FACES DE LA VIE ET DE LA MORT DE MARIE DE MEDICIS ROYNE DE FRANCE VEFVE DE HENRY IV. MERE DE LOVYS XIII. ROYS TRES-CHRESTIENS. DISCOVRS FVNEBRE. Par Messire MATTHIEV DE MOVRGVES Sr. de Sainct Germain, Docteur en Theologie, premier Aumosnier & Predicateur de ladite DAME ROYNE; Predicateur du ROY CATHOLIQVE, & Preuost de Harlebeke en Flandres. DEDIÉ A LA ROYNE CATHOLIQVE. , français, latinRéférence RIM : Mx. Cote locale : D_1_3.
-- 48 --
pour augmenter les biens de son ame, & l’instruire
dans la solitude. Les prosperitez empeschent, qu’on
n’escoute Dieu ; parce que les creatures font trop de
bruit, & que dans l’authorité Royale, tous ceux qui
accourent pour en tirer les charges & les biens en les
puisant dans ces fontaines publiques, les troublent
bien souuent. Nous lisons & admirons dans l’Escriture
sainte les hautes leçons que Dieu a fait à Iob couché
sur le fumier ; & nous apprenons dans la sainte vie
& estranges afflictions de ce Roy, que la Diuine
Bonté, qui veut conduire vne ame à soy, luy fait
meriter par les œuures de charité, faites dans la prosperité,
les instructions & les graces, qu’apportent les
aduersitez bien receües. Celuy qui desireroit que tout
l’hyuer fut doux, seroit ennemy des arbres fruitiers,
qui pour estre fertiles, doiuent sentir les gelées. Celuy
qui veut auoir vne vigne feconde, doit sçauoir, qu’il
ne la peut rendre riche en fruit, qu’en la faisant
pauure en serment. Les Palestins, qui veulent cueillir
beaucoup de dattes, arrousent les pasmiers auec
de l’eaüe salée. Les figues en Egypte ne meurissent
iamais, si l’arbre n’est deschiré auec des peignes de
fer : ce qui a fait dire à Pline auec raison, qu’il y a des
choses en la nature, ausquelles on ne peut faire du
bien, sans leur faire du mal. Ie sçay bien, que les ames
delicates apprehendent ces caresses de Dieu, & voudroient,
que sa sainte Prouidence espargna leur
|