Morgues, Mathieu de [1643], LES DEVX FACES DE LA VIE ET DE LA MORT DE MARIE DE MEDICIS ROYNE DE FRANCE VEFVE DE HENRY IV. MERE DE LOVYS XIII. ROYS TRES-CHRESTIENS. DISCOVRS FVNEBRE. Par Messire MATTHIEV DE MOVRGVES Sr. de Sainct Germain, Docteur en Theologie, premier Aumosnier & Predicateur de ladite DAME ROYNE; Predicateur du ROY CATHOLIQVE, & Preuost de Harlebeke en Flandres. DEDIÉ A LA ROYNE CATHOLIQVE. , français, latinRéférence RIM : Mx. Cote locale : D_1_3.
-- 41 --
la liberale Royne du monde, qu’il n’y auoit quasi
point d’Eglise en France où la S. Vierge fit paroistre
plus ordinairement son credit, qui ne fut embellie par
quelque marque de sa pieté. Nostre Dame de Paris,
nostre Dame de Chartres, nostre Dame des Ardilliers,
nostre Dame de Liesse, nostre Dame des Vertus,
nostre Dame de S. Victor, & plusieurs autres chapelles
miraculeuses, l’ont veuë pelerine, & sont ornees
de ses presens ? on les voit aussi dans nostre Dame de
Lorete, de Montserrat, & en plusieurs autres pays
esloignez. Tous les Samedis en France & aux
Païs-bas elle visitoit quelque lieu dedié à la S. Vierge,
& taschoit d’augmenter son culte par tout. Elle a
voulu, que toutes les chapelles qu’elle a fait dresser
dans plusieurs monasteres de Paris, luy fussent dedies :
a esté soigneuse de faire tailler quantité de belles
Statuës des bois de Montegu, & de Foix, les ayant
enrichies d’or, de diamans & de perles, pour les enuoyer
en diuers endroits ; afin qu’elles attirassent la
deuotion des Peuples. Sur cet article de sa deuotion
enuers la S. Vierge ie pourrois faire vn liure, si ie voulois
publier toutes mes cognoissances. I’acheue par les
dernieres actions de la vie de nostre Royne, qui mit
son ame entre les mains de sa glorieuse Patrone, afin
qu’elle la presenta à son Fils ; & la parole qui acheua
la voix & la vie de Marie fut MARIE. Icy la tendresse
de mon ressentiment surmonteroit ma raison, si elle
|