Morgues, Mathieu de [1643], LES DEVX FACES DE LA VIE ET DE LA MORT DE MARIE DE MEDICIS ROYNE DE FRANCE VEFVE DE HENRY IV. MERE DE LOVYS XIII. ROYS TRES-CHRESTIENS. DISCOVRS FVNEBRE. Par Messire MATTHIEV DE MOVRGVES Sr. de Sainct Germain, Docteur en Theologie, premier Aumosnier & Predicateur de ladite DAME ROYNE; Predicateur du ROY CATHOLIQVE, & Preuost de Harlebeke en Flandres. DEDIÉ A LA ROYNE CATHOLIQVE. , français, latinRéférence RIM : Mx. Cote locale : D_1_3.
page précédent(e)

page suivant(e)

-- 34 --

sa main lors qu’il rendit l’esprit à Dieu. Ainsi mourut
MARIE DE MEDICIS Royne de France, Mere ou
Belle-mere de trois Roys, dans la ville des trois Roys,
le troisiesme de Iuillet. Ainsi acheua sa vie amere la
Mere & grãd-mere de tant de Princes & Princesses ; à
laquelle Dieu pouuoit dire ce qu’il disoit à Ierusalem
desolé : MARIE DE MEDICIS, qui te donnera vne
medecine, lors que ton affliction est aussi grande que
la mer ? Certes la seule mort suiuie d’vne vie meilleure
estoit capable de la guarir Ie ne diray rien de l’ouuerture
de son corps, qui fut faite contre sa volonté ; ny
de ce qu’on recognut dans ses entrailles, qui auoient
porté les Roys & les Roynes, & que ie peux dire
auoir esté bonnes à ses Enfans ; ayant pour ce subjet
pris pour sa deuise le Pelican, qui tire son sang pour
nourrir ses petits. Elle pouuoit dire en mourant auec
Noëmi, que ce grand Dieu qui l’auoit remplie d’amertume,
nous l’auoit donnée remplie de biens pour
la retirer vuide. Elle estoit venuë remplie, estant née
Fille d’vn Grand Duc & de la Fille d’vn Empereur.
Elle auoit esté conduite en France remplie de thresors
plus grands que ceux des Roynes qui l’auoient
precedée. Elle auoit esté dans ce Royaume remplie
d’Enfans, d’honneurs, de Majesté, de puissance,
de ioyaux, de terres assignées à son doüaire,
& rachetées des éstrangers par son mesnage. Ce
mesme Dieu, qui l’auoit ainsi remplie en venant,


page précédent(e)

page suivant(e)