les eaux, afin qu’on remarque, que le feu, l’air, l’eau
& la terre l’on espouuentée trois fois, Son Mariage
auec vn Roy de France fut l’acquisition d’vn Lis entre
les espines : celles-cy sortoient des inclinations de
Henry IV. Prince adonné à ses plaisirs, qui diuisoient
son cœur. Celles qui le vouloient auoir tout
entier, entreprenoient sur l’amour legitime ; ainsi
qu’il arriue d’ordinaire en semblables rencontres. Vn
iour en passant le bac à Nully, à deux lieues de Paris,
les cheuaux du carrosse, dans lequel le Roy estoit
auec elle, s’ombragerent, & renuerserent le batteau
soubs lequel la Royne se trouua la plus enfoncée ; &
fut tirée du plus profond de l’eau par vn valet de pied,
qui la prit par les cheueux. Elle estoit alors grosse du
Duc d’Orleans qui mourut en enfance. Vne autre
fois estant au chasteau de Rosny, vne rauine de pluye
fit vn tel désbordement, que la maison fut sur le point
d’estre emportée ; & on fut contraint de sauuer la
Royne par vn eschelle appliquée aux fenestres. La
plus sensible de ses afflictions fut en la mort estrange
de son Espoux Henry IV. qu’elle auoit prié instamment,
de ne sortir point le iour qu’il fut massacré ;
vn pauure Gentil-homme de Bearn s’estant addressé
à elle, pour la supplier d’empescher que le Roy ne
parust point ce iour là dans les ruës de Paris, &
que s’il le faisoit, on le rapporteroit mort ; comme il
arriua.