Royaume toutes celles de Iustice, de Finances &
de Police, faisant paroistre son pouuoir absolu
en auançant les personnes qui luy estoient ou
agreables ou vtiles. Afin que ses diuertissemens
fussent profitables, comme ils estoient honnestes, ils
ne s’employoient qu’à esleuer des bastimẽs superbes,
à faire conduire des fontaines dãs Paris, & paracheuer
les ouurages, que la mort de Henry IV. auoit laissé
imparfaits. La plus releuee pensee de la Regente fut,
d’asseurer la paix du Royaume de France par la
double alliance auec l’Espaigne. Nonobstant toutes
les oppositions, son courage vint à bout de ce
glorieux dessein, qui eut apporté vn grand repos à la
Chrestienté, si on eut tousiours suiuy en France les
sages conseils de la Royne. Apres la conclusion des
traictez de Mariage, la Regente ordonna les demonstrations
de resiouyssances si extraordinaires, que nous
pouuons dire sans excez, que de plusieurs siecles la
terre n’a rien veu de si magnifique que ce qu’on
appella Carrosel, qui durant trois iours cousta plus de
trois millions de liures à la Royne, ou aux Princes
& principaux Seigneurs de France. Ie ne dits rien du
Balet de Madame, qui est à present la Royne d’Espaigne,
ny de ces palais enchantez, ny de ces machines,
qui faisoient voir le ciel en terre, la terre dans le
ciel, & mesloient les elemens sans les confondre.
Sa Regence fut couronnee par le remerciement du

page précédent(e)

page suivant(e)