Morgues, Mathieu de [1643], LES DEVX FACES DE LA VIE ET DE LA MORT DE MARIE DE MEDICIS ROYNE DE FRANCE VEFVE DE HENRY IV. MERE DE LOVYS XIII. ROYS TRES-CHRESTIENS. DISCOVRS FVNEBRE. Par Messire MATTHIEV DE MOVRGVES Sr. de Sainct Germain, Docteur en Theologie, premier Aumosnier & Predicateur de ladite DAME ROYNE; Predicateur du ROY CATHOLIQVE, & Preuost de Harlebeke en Flandres. DEDIÉ A LA ROYNE CATHOLIQVE. , français, latinRéférence RIM : Mx. Cote locale : D_1_3.
page précédent(e)

page suivant(e)

-- 15 --

la chambre auoit pour tapisserie des Fleurs de lys en
broderie de perle. La Grande Duchesse, la Duchesse
de Mantouë, la Tante & la Sœur accompaignerent
l’Epousée iusques à Marseille, où deux Cardinaux, le
Cõnestable de France, & le Grand Escuyer du Roy
la receurẽt au port de la ville qui n’auoit iamais veu
tant de galeres, ny ouy tant de canonades, ny tãt de
fanfares de clairons & de trompetes, ny le son de
tant de tambours, ny fait des magnificẽces pareilles
Les habitans de la ville, iusques à huict ou dix mille
hõmes, estoient dessous les armes, tous couuerts de
soye de diuerses couleurs. On voyoit le mouuemẽt
donné à plusieurs machines, & on passoit sous des
Arcs triomphaux, qui faisoient estimer l’esprit de
ceux qui les auoient embellis d’Emblemes & d’Inscriptions,
& descouuroient les richesses de cette
ville plus ancienne que Rome. Les autres villes de
France, qui estoient sur le passage de la nouuelle
Royne, firent à l’enuy des receptions magnifiques.
Auignon, subiete au Pape, ne voulut point ceder
aux plus affectionnées & plus belles villes de France.
Celle de Lyon, comme plus opulente, les surpassa
toutes, & eust l’honneur, que le mariage s’accõplit
chez elle. Le Roy Henry IV. y rencõtra son Espouse,
venant de la cõqueste de Sauoye & de Bresse. Par
quel bonheur commença ce Mariage, qui dans dix
mois produisit vn Heritier à la Couronne de Frãce ;


page précédent(e)

page suivant(e)