basses ; Voyez vous ces fontaines merueilleuses, qui
sont tantost chaudes, tantost froides, ores douces, ores
ameres ? C’est nostre vie. Voyez vous cette terre,
qui dans vn agreable Printemps est toute riante &
esmaillée de mille belles couleurs ; la voyez vous apres
dans vn triste Hyuer comme pleurante, & en habit
de deuil ? C’est nostre vie. Pardessus tous ces pour
traicts au naturel des changemens de nostre vie,
i’estime celuy de Seneque, qui la compare au chemin,
sur lequel nous roulons quelques fois auec plaisir
comme vn carrosse dans vne prairie, & bien tost aprés
nous tremblons, ou sur les pointes des rochers, ou
dans les fondrieres bourbeuses. Cette Statuë de l’Isle
de Chio, qui paroissoit auec vn visage gay estant
regardée par ceux qui entroient dans vn temple, &
monstroit à ceux qui en sortoient vne face triste,
estoit vn image müette, qui ne laissoit pas de parler,
pour nous enseigner les deux contrarietez, qui se
rencontrent dans nostre alternatiue vicissitude de
bien & de mal, de vie & de mort.

Ce sage reueur & clair-voyant aueugle Homere
auoit subiet de dire, que son Iupiter, qui est parmy
nous la Prouidence Diuine, estoit entre deux tonneaux
meslant & respandant sans cesse sur la terre
le doux & l’aigre, les felicitez & les miseres. Pour
monstrer que les vnes & les autres ont esté versées,
abondamment sur MARIE Royne de France, dressons