qu’il y a deux ordres a Dieu, par le premier, les hommes
ne sçauent point pourquoy Dieu faict ce qu’il
faict que par vne grace particuliere : & quant au
second l’homme les sçait par les causes secondes qui
sont les Astres : Et comme Saül auoit l’option de
le faire ou de ne le faire pas, ne l’ayant point faict
Dieu le chastia, en luy ostant la vie & celle de ses
enfans. De quoy seruiroit le liberal Arbitre aux
hommes, sils n’auoient le chois de suiure leur volontés
& leur inclination, quoy quelle prouienne
par le faict des choses Superieures, c’est pour vous
dire que difficillement les hommes se peuuent destourner
des inclinations, que les Astres les induisent
que par quelque grace particuliere, si ce n’estoit
vn effect de la precience de Dieu, en vain auroit
il fait des commandements.

Enfin il faut auoüer qu’il y a relation entre
la pensée de nostre ame & l’inclination de nos
corps ; ce n’est pas adire aussi que la pensée suiue
tousiours l’inclination : mais bien plus tost l’inclination,
la pencée, car autrement il sembleroit
que l’homme n’auroit point le liberal Arbitre, ny
d’option pour eslire le bien ou le mal, & les sçauoir
distinguer l’vn de l’autre, ce qui est commun
aux Animaux en quelque façon, & bien que le
corps ne soit que l’instrument de l’Ame, si est ce
pourtant que l’Ame suit bien souuent les passions
du corps, a cause de l’inclination de ceste Ame
vniuerselle qui luy influe ses raisons ocultement,
c’est pourquoy les Philosophes ont dit, Sapiens dominabitur
astris, Pourquoy les Philosophes auroient